Luke 19
Meatin tai ten takis viles ran tisaen ka maen Ahi voutut moulien onen
1Navong Iesu mul veah en sise vaha en out Serusalem, rokol taon ten out Seriko ka mul ka vasi. 2En out Seriko, avat tai onen meatin keil ten takis ro koa tounah keil onen houlu, isen Sakias. 3Kei mul sak visi valesi keke Iesu vi isei, ka sakras veni kei tamureis, ka vangi meatin keil koa amul amusili avi houlu ramat. 4Sakini kei muloh mulamu en vangi meatin keil enek, ka veoun vati sikamo tai keke vales Iesu navong housil sise hemai heli out koa mul ien. 5Ka navong Iesu mai mal en out koa Sakias mul ien, kei lele vina nesa ka viteni mini vit, “Sakias, kikalah kimita netan, veni kosa, inau nito en teim som.”6Sakini, Sakias kalah mita netan. Kei si kei ka mulamun Iesu luva en teim sen. 7Meatin vasi keil koa alesi aselus kutut kat Iesu avit, “Meatin enek va en teim sen meatin tisa tai.”
8Navong Iesu ka meatin sav keil amul semau en teim sen, Sakias mea mulomal ka viteni min Iesu vit, “!Asuv, kitaengon nau! Nititi vasi tounah vasi keil onak ihe vangite helu, ka vangite tai, nisani min koakeil tounah one tovuol. Ka munak navenan mane ran etai meatin en umen onak, nisa kesi mini hetal min hatte hetel eris.”
9Navong viteni mukok, Iesu viteni mini vit, “Kosa, korie lati keke Ahi mutut moulien onom ka onen koakeil aro en teim som. Anatin, keik emun kovi natin Ebraham tai veni koling demkatien onom en Ahi suval koa kei mumoni. 10Natin Meatin mai en out netan valekat meatin keil koa avupuol, ka voutut moulien one.”
Iesu viten tatavolien tai usil hetamen tai koa riti vas mane onen min slev keil onen a
11Navong Iesu mul veah en out Seriko, meatin keil amul amundem usil asa koa hekistal navong hetokol taon ten out Serusalem. Veni houlu en meatin keil amul amundemi keke navong Iesu hetokol Serusalem, kei hemai hehi asuv houlu tai ka hiasuvien onen Ahi hemai hekistal. Sakini, Iesu viten tatavolien koanek min keil 12vit, “En avong tai, hetamen tai mul sak mesen kei valokovein kantri kati onen keke vaha vales mari asuv houlu koa lekat kantri vasi keil. Kei va keke mari asuv houlu enek hesan keihoen mini keke heha ris en vulin keke hemai hehi asuv houlu valekat meatin keil ten kantri kati onen. 13Ka mulamu, kei vis slev halualim (10) onen avamai keke vatiti vas mane onen min keil. Ka san mane handred taosen tai (100,000) min tetai en keil. Evus, viteni min keil vit, 'Mihekur mane koanik ka miheha mihoum hetal mini hetokol avong koa nimai ris eni.'14“Hetamen enek va, ka meatin keil en out onen koa avi vativieh ral mini, tine tisa kati. Sakini keil asila meatin keil one avaha avahiteni min kei koa vi houlu ten kantri avit, 'Komai emai rovatei meatin ekek vamai vahi asuv houlu onomai.' 15Ka avaseini keke ie rovattei, mari asuv houlu koa lekat kantri vasi mumoni vi asuv houlu one. Evus, kei va ris en kantri kati onen.
“Navong hetamen va ris suval asuv houlu, vise slev keil onen umai keke valong kilea amumon sa ral min mane koa kei riti vasi min keil. 16Koa mulamu mai veni ka viteni mini vit, 'Asuv, inau namum ral min mane onom, ka navotin mane vi milian tai (1,000,000) eris nesa en asa koa kosani minau.'
17“Hetamen enek viteni mini vit, ‘!Tahos vareis! Keik kovi more slev tai. Ka veni keik kolosil kat revi tounah koa havivis, nilinguk kilosil kat taon halualim (10) onak.'
18“Tamun mai ka viteni mini vit, ‘Asuv, namum ral min mane onom, ka navotin mane vi handred taosen elim (500,000) eris nesa en asa koa kosani minau.’
19“Ka hetamen enek viteni mini vit, 'Hesakini, keik kilosil kat taon elim (5) onak.’
20“Ka slev tamun mai veni ka viteni vit, ‘Asuv, mane onom keiek. Nakav koe revi en kaliko tai ka naling seh eni. 21Namumoni mukonek veni nakilea kovi meatin takeih tai ka nametaunuk. Keik kokur tounah keil koa kormumtei veni, ka kokur anien koa meatin sav keil amum veni en ah keil osom.’
22“Evus hetamen enek vit, ‘!Keik kovi slev tatisa tai! !Inau nisakin selusien keil onom hemai heatuk eris! Kokilea keke inau navi meatin takeih tai, namul nakur tounah keil koa narmumtei veni, ka nakur anien koa meatin sav keil amum veni en ah keil osak. 23?Hesakini, vensa suk korlingtei mane onak en bang? Sise enek maes, ka navong numai ris, nakilea makur ris mane onak vatal min titan teni.’
24“Evus, hetamen enek viteni min koakeil amulomal vesesal veni vit, 'Alkulat mane enek rani, ka mihesani min slev onak koa kur mane milian tai (1,000,000).'
25“Ka keil aviteni mini avit, ‘!Ka asuv houlu, kei kur mane milian tai (1,000,000) tuai!’
26“Ka hetamen enek vit kesi min keil vit, ‘Koanik vi anatin, koakeil amul amum ral min asa koa nalingi en he, keil ikuri hehi houlu tamun. Ka koakeil armumtei vatal min asa koa nalingi en he tuai, avaseini vi havivi mok, nikulati ran keil.'
27“Evus, hetamen enek viteni min meatin keil onen vit, ‘Ka kosa, allamun vativieh keil onak koa ie rovatei nau mamai mahi asuv houlu one avamai venau, ka mihou vini keil vasi imatmat en metok.’ “
28Navong Iesu selus min meatin keil evus, kei lokovein meteimal ten out Seriko, ka kur ris sise onen vaha ven taon ten out Serusalem ral min meatin keil onen.
Tei en meatin keil ten out Serusalem akur revi Iesu suval vi asuv houlu tai b
29Navong umai vesesal en out meteimal keilu ten out Betfas ka Betani, vesesal en Hou Nei Olip, Iesu vis elu en meatin keil onen keke luvaha luvalamu en keil. 30Kei viteni min keilu vit, “Milheha en meteimal kei va. Ka navong milheha neim eni, milhehotin sili dongki tai koa apar kati mules, koa meatin tovuol veah vatondan eni. Milheluvati ka milhelamuni hemai ekok. 31Munak meatin tai vis kamil keke vensa milmul milluvati, milhehiteni mini keke Asuv ien vati.”32Sakini, koakeilu Iesu sila keilu luva ka lules tounah vasi suval etin koa kei viteni min keilu. 33Ka navong lumul luluvati, meatin keil koa ose umai ka avis keilu avit, “?Kamil milmul miluvat sili dongki osomai vensa?”
34Ka luvit kesi mini luvit, “Asuv ien vati.” Navong alonge mukok, meatin keil enek amaeni min keilu. 35Evus, keilu lumulamun sili dongki enek va ven Iesu. Luling kot omealu en eisilin dongki, ka lukataun Iesu vatondan eni. 36Ka navong kei mul muloh eni ka musil sise vaha, meatin keil avue revi kot keil ome en sise vatie lat houhouen one mini.
37Ka navong Iesu mai vesesal en out Serusalem, mal en sise vaha en Hou Nei Olip, meatin keil onen ka koakeil emun amul amusili amasmas Ahi. Keil amakul en sien min Ahi ven merikel keil koa alesi mumoni. Keil avit,
38“!Tokolkatien hel en asuv houlu koa mul mai en isen Ahi Asuv!
Kei heling tomat hetal min meatin keil ka Ahi,
ka keil ihati lat isen hehina nesa.”(Sam 118:26)
39Ka navong tei en Farasi keil koa amul en vangi meatin keil enek along selusien one, aselus keih min Iesu avit, “!Tiser, kimeng kat meatin keil onom avato raeng!”
40Ka Iesu vit kesi min keil vit, “Naviteni min kami, munak keil ito raeng, ahat keil ekek esuk imakul ihitehiteni.”
Iesu murang ven meatin keil ten out Serusalem veni alei ras asa koa Ahi mul mumoni ven keil
41Navong Iesu mai vesesal en taon ten out Serusalem, kei lele lesi, ka mis 42vit, “O me-Serusalem keil, munak milei kilea sise ten tomat, mikilea mivakuri. Ka kosa, milei rasi. 43Anatin eli, avong tai mul mai koa vativeah keil onami imai ivae kat kami. Keil ika rahit vieh keil ten taon onami ka misakras mivalohosae ran he. 44Keil u vini kami hetal min titami keil emun. Ihu lin tounah vasi keil onami, ka ahat keil vasi en vieh ka eim keil onami irkapil vituaitei mun. Tounah keil enek hekistal en kami veni mirlei kileatei avong koa Ahi mai ven kami keke voutut moulien onami.” ▼Hetetamen keil onen Siu keil ie vati avou vini Iesu veni likat rasilin meatin keil uvaha ran Eim Votut onen Ahi d
45Navong Iesu rokol Serusalem, va mau en Eim Votut onen Ahi. Ka navong va neim en teahu teni, lesi keke meatin houlu amul asalem en sipsip ka aman keil houlu ten sanien votut eni. Sakini, Iesu tin katiat ka likat rasilin keil rani 46vit, “Amutis kati en Tus Votut vit,'Eim Votut onak hehi eim tahisien.'(Aes 56:7)
Ka kami mivilesi mai vi'eim tatosuaien' onen tarhena keil.”(Ser 7:11) Evus, Iesu lokovein out enek.
47Katau suk, en avong vasi en wik koanek, Iesu va ris en teahu ten Eim Votut onen Ahi ka visein meatin keil eni. Ka asuv keil onen pris keil, tiser keil ten Mengkatien keil onen Mosis, ka avat sav keil onen me-Isrel keil arun lekat sise keke akilea avou vini Iesu vamat vaka ien ven tounah keil koa Iesu mumoni ka mukave rolei kileatei hetetamenien one. 48Ka asakras veni, lisenges, vangi meatin keil amuting rahiti veni evati mok avalong revi selusien keil onen.
Copyright information for
PMA